სოციალურად დაუცველი და გაჭირვებული ოჯახებისთვის პროდუქტების დარიგება გრძელდება. თბილისში, ბელიაშვილზე მდებარე სპორტულ კომპლექსში შეგროვებულ პირველადი მოხმარების ნივთებსა და პროდუქტებს მოხალისეები ახარისხებენ, რის შემდეგაც ისინი იგზავნება გამგეობებში, რომლებიც, თავის მხრივ, შეგროვებულ პროდუქტებს სოციალურად დაუცველ და შეჭირვებულ ოჯახებს გადასცემენ.
პროდუქტის დახარისხების პროცესს გაეცნო დღეს თბილისის მერი, კახა კალაძე, რომელმაც მადლობა გადაუხადა პროექტში ჩართულ ადამიანებს მხარდაჭერისა და თანადგომისთვის.
„ჩვენ ახალ წლამდე დავარიგეთ პროდუქტები, თუმცა არ ვჩერდებით და ვაგრძელებთ. თქვენ იცით, რომ მილიონ ორასი ათასი ლარი იქნა გამოყოფილი დედაქალაქის ბიუჯეტიდან ამ პროდუქტების შესაძენად. აქედან შვიდასი ათასი ლარი იყო ის თანხა, რომელიც საახალწლო სოფლის მოსაწყობად უნდა დახარჯულიყო, თუმცა არსებული რეალობიდან გამომდინარე, ეს თანხა პროდუქტების შესაძენად გამოვიყენეთ.“ – განაცხადა კახა კალაძემ და აღნიშნა, რომ დახარისხებულ პროდუქტებს მოსახლეობას ხვალ დაურიგებენ.
