გაუგებარია, რატომ იყო ვეტო გამოყენებული. ვეტოს შემდეგ კანონპროექტი და საკითხი უბრუნდება პარლამენტს. შემდეგ სესიაზე, როდესაც საკითხი პარლამენტს დაუბრუნდება, ჩვენ განვიხილავთ და მივიღებთ კვლავ მხარდამჭერ გადაწყვეტილებას, – ასე ეხმიანება საქართველოს პარლამენტის ვიცესპიკერი, არჩილ თალაკვაძე პრეზიდენტ სალომე ზურაბიშვილის განცხადებას, რომლითაც მან მოსმენებთან დაკავშირებულ კანონპროექტს ვეტო დაადო.
თალაკვაძის თქმით, კანონპროექტი განხილული იყო ყველა დაინტერესებულ მხარესთან და საკმარისი არგუმენტები იყო წარდგენილი და გაზიარებულიც.
“ეს კანონპროექტი ორი-სამი წლის განმავლობაში იყო განხილული ყველა დაინტერესებულ მხარესთან, საკმარისი არგუმენტები იყო წარდგენილი და გაზიარებულიც, რომ ეს ცვლილებები დღეს პირდაპირ პასუხობს გამოწვევებს, რომლებიც უსაფრთხოების თვალსაზრისით არსებობს საქართველოს წინაშე. შესაბამისად, ამ შემთხვევაში, რა თქმა უნდა, გაუგებარია, რატომ იყო ვეტო გამოყენებული. ვეტოს შემდეგ კანონპროექტი და საკითხი უბრუნდება პარლამენტს. ჩვენ ერთხელ უკვე დავუჭირეთ მხარი და მივიღეთ ეს ცვლილებები პარლამენტში, რადგან არსებობს სათანადო არგუმენტაცია ამ ცვლილებებისთვის, შემდეგ სესიაზე, როდესაც საკითხი პარლამენტს დაუბრუნდება, განვიხილავთ და კვლავ მხარდამჭერ გადაწყვეტილებას მივიღებთ”, – განაცხადა არჩილ თალაკვაძემ.
ცნობისთვის, საქართველოს პრეზიდენტმა, სალომე ზურაბიშვილმა ვეტოს უფლება დღეს პირველად გამოიყენა და საკანონმდებლო ცვლილებას “მოსმენების გაფართოების შესახებ” ვეტო დაადო.
